Ангилал: Нийгэм
“ТОГТВОРТОЙ ХӨГЖИЛ МИНИЙ МОНГОЛД, 2030 ОН” сэдвийн дор фото зураг, дүрс бичлэгийн уралдаан зарлалаа
Тогтвортой хөгжлийн зорилгтыг 2015 онд Нэгдсэн Үндэстний Байгууллага /НҮБ/-ын Ерөнхий Ассамблейн Тогтвортой хөгжлийн чуулга уулзалтаар урд өмнө байгаагүй өргөн цар хүрээтэй хөгжлийн хөтөлбөрийг баталсан. Улс орнууд ТХЗ-ын хэрэгжилтээ дүгнэх зорилгоор сайн дурын үндсэн дээр “Үндэсний сайн дурын илтгэл”-ийг бэлтгэн НҮБ-ын Тогтвортой хөгжлийн зорилгын Улс төрийн өндөр түвшний чуулга уулзалтаар танилцуулдаг. Монгол Улсын Засгийн газар энэ оны 7 дугаар сард “Үндэсний сайн дурын илтгэл”-ээ танилцуулах гэж байна.
Монгол Улсын илтгэл нь “хөгжлөөс хэнийг ч орхихгүй” байх зарчимд үндэслэн 17 зорилгын хэрэгжилтийг үнэлэн, тогтвортой хөгжлийг хангах бодлогын орчныг шинчилж, дүгнэлт, зөвлөмж гаргана. Түүнчлэн, тогтвортой хөгжлийг цогцлооход тулгарч буй хөгжлийн олон тулгамдсан асуудлууд байгаа бөгөөд эдгээр асуудлыг салбар дундын уялдаа, зохицуулалт, олон талын оролцоо, хамтын ажиллагаанд тулгуурлан хэрхэн шийдвэрлэх талаар өдгөө хөгжлийн нэн тулгамдсан асуудал болсон агаарын бохирдлын жишээн дээр авч үзэж, зөвлөмж гаргана.
Энэ хүрээнд Монгол Улсын “Үндэсний сайн дурын илтгэл”-ийн нүүр хуудсанд хэвлэгдэх зураг, дүрс, бүтээлийн уралдааныг зарлалаа. Энэхүү уралдаанд нас, хүйс, арьс өнгө, яс үндэс, хөгжлийн бэрхшээл болон бусад нөхцөл байдлаас үл хамааран хүн бүр оролцох боломжтой. Шалгарсан бүтээл энэ оны ТХЗ-ын Улс төрийн өндөр түвшний чуулга уулзалтаар Монгол Улсын Засгийн газраас танилцуулах “Үндэсний сайн дурын илтгэл”-ийн нүүр хуудсанд хэвлэгдэх юм.
Бүтээлийн сэдэв: “ТОГТВОРТОЙ ХӨГЖИЛ МИНИЙ МОНГОЛД, 2030 ОН” 10 ЖИЛИЙН ДАРАА ТАНЫ ХҮСЧ БУЙГААР МОНГОЛ ОРОН, МОНГОЛ ХҮН ЯМАР БАЙХ ВЭ? гэсэн сэдвийн хүрээнд зохион байгуулагдах юм.
Хугацаа: Бүтээлийг 2019 оны 5-р сарын 9-өөс 2019 оны 5-р сарын 24-ны өдрийн 23:00 цаг хүртэл sdgsinmongolia2030@gmail.com цахим хаягаар хүлээн авна.
Бүтээлд тавигдах шаардлага:
- Тайлан А4 хэмжээтэйгээр хэвлэгдэх тул уг хэмжээнд тохирох бүтээлийг хүлээн авна.
- Бүтээлийн төрөл, хэлбэрийг чөлөөтэй сонгох боломжтой /гар зураг, фото зураг, график дизайн гэх мэт/.
- Бүтээлийг зөвхөн sdgsinmongolia2030@gmail.com цахим хаягаар хүлээж авах тул цахим шууданд багтах задгай файл эсвэл Dropbox, Google Drive, OneDrive гэх мэт нийтэд зориулсан үүлэн технологийн холбоосоор хүлээн авна.
- Файлын холбоос нь .jpg, .png, эсвэл .pdf байх шаардлагатай бөгөөд өндөр нягтшилтай буюу бүтээлийн хэмжээ 1000 pixel-с дээш байна.
Хэрэгжүүлэгч байгууллага: Үндэсний хөгжлийн газар
Холбоо барих: Үндэсний хөгжлийн газрын Хөгжлийн бодлого, төлөвлөлтийн газар (sdgsinmongolia2030@gmail.com, 51-261575, 51-266314)
Жич:
- Тогтвортой хөгжлийн зорилгын талаар дэлгэрэнгүй мэдээллийг https://www.un.org/sustainabledevelopment/sustainable-development-goals/;
- Монгол Улсын Үндэсний сайн дурын илтгэлийн талаар http://nda.gov.mn/1467.html;
- Монгол Улсын Тогтвортой хөгжлийн зорилгын үзүүлэлтийн талаар http://sdg.gov.mn/ зэрэг холбоосноос авна уу.
